A Deputación de Lugo espera aprobar antes de final de mes unhas contas que crecen un 10% ata os 110 millóns

Tomei presume da "repartición obxectiva" de fondos e o PP rebate que os concellos de PSOE e BNG levan dous terzos das achegas

Comparecencia do presidente da Deputación de Lugo, José Tomei, na Comisión de Orzamentos do Parlamento de Galicia. DEPUTACIÓN DE LUGO

O goberno da Deputación de Lugo espera levar a pleno antes de que conclúa este mes de setembro as contas para o ano 2023, que ascenden a un total de 110 millóns de euros, un 10% máis respecto ao pasado ano e que o mandatario provincial, José Tomei, atribúe á subida das achegas do Estado.

O presidente lugués e alcalde de Monforte de Lemos tomou a testemuña do seu homólogo na Coruña e compañeiro de partido, Valentín González Formoso, na rolda de presidentes provinciais que este xoves pon o broche ás comparecencias parlamentarias de orzamentos na Cámara autonómica.

Alí, tras manifestar por regresar a que foi a súa “casa” como deputado no Grupo Socialista, José Tomei resaltou que o obxectivo do executivo provincial que encabeza –conformado por PSOE e BNG– é ter aprobados en pleno a finais de novembro as contas para que estean en vigor no mes de xaneiro.

Os orzamentos ascenden a un total de 110 millóns de euros, dos cales, Tomei destacou os 21,5 millóns que recibe de asignación inicial o ‘Plan Único‘, a través do cal a administración provincial realiza “un esforzo moi importante” para repartir fondos entre os concellos baixo criterios “xustos e obxectivos”.

“Lamentamos non poder dicir o mesmo da Xunta”, apostilou o responsable socialista, que comparou o 20% que representa nas contas provinciais este sistema de financiamento local con “apenas o 1,13% do orzamento total da Xunta” que vai parar ao Fondo de Cooperación Local.

OBRAS, ESTRADAS E SERVIZOS PÚBLICOS

Despois de situar a execución orzamentaria da institución entre “o 85 e o 90 por cento”, José Tomei subliñou que a deputación reserva case un terzo das súas contas, é dicir, 30 millóns de euros; para financiar actuacións na rede viaria da provincia, outra cifra que quixo comparar co investimento da Xunta nas estradas luguesas, ás que, segundo o presidente, dedicará 10 millóns de euros o próximo ano.

Ademais, tamén destacou a aposta polo programa ‘Feminino Rural’, orientado a favorecer a creación de emprego entre as mulleres no rural lugués e que se desenvolve en colaboración coa Asoicación de Mulleres Empresarias de Lugo.

Tamén terán continuidade en 2023 o proxecto ‘Acelera PEMEs’ e o programa ‘Reiníciache’, ao que se destinan 4 millóns de euros procedentes de fondos europeos para favorecer a inserción laboral de colectivos con dificultades para atopar emprego.

Neste punto, Tomei cargou contra a Xunta pola “ausencia” dun plan industrial para a comarca da Mariña que tamén bota en falta en Lugo e en toda Galicia. “Nin bo, nin malo, nin regular; simplemente non o hai”, apostilou.

En canto ao gasto social, o presidente avanzou que en 2023 a rede provincial de centros de maiores contará con nove residencias –as últimas comprometeunas para Navia de Suarna e Ribas de Sil– e que a administración traballa na elaboración doutro nove proxectos noutros tantos municipios.

Por último, apuntou a captación de 1 millón de euros, tamén chegados de fondos comunitarios, para os 29 municipios que conforman as dúas Reservas da Biosfera da provincia –Terras do Miño e Os Ancares–, onde levarán a cabo proxectos para impulsar o sector primario e o turismo “sustentable”.

PP CRITICA REPARTICIÓN DE FONDOS

Na quenda dos grupos, o deputado do PP Daniel Veiga puxo en dúbida que a repartición de fondos a través do ‘Plan Único’ leve a cabo con criterios obxectivos, como defendeu o presidente; xa que asegurou que os municipios gobernados polo Partido Socialista repártense o 63% do total, o 5% vai para “o catro alcaldías que ten o BNG” e o 32% “para o grupo maioritario” na provincia, o PP.

Para o parlamentario popular, é “o dedo divino” do presidente provincial o que determina que concellos reciben fondos e canto levan. Ademais, Veiga negou que a Xunta non incremente de face ao próximo ano as partidas asignadas ao Fondo de Cooperación que, segundo aseverou, aumentan un 14%.

Así mesmo, Veiga tachou a Tomei de ser un presidente “moi pasota” coas infraestruturas da provincia, á vez que denunciou que as promesas de construción de novas residencias “non se cumpren nunca”.

Ante isto, na súa quenda de peche, o presidente provincial defendeu o gasto social do seu goberno fronte a unha Administración autonómica ten “40 veces máis orzamento” en políticas sociais que a Deputación de Lugo e vaticinou que os compromisos recolleitos nas contas da Xunta de 2023 para a construción da Rolda Este de Lugo quedarán “en nada”. “Non se vai a construír nin un só metro”, apostilou.