Tres persoas resultaron feridas nun accidente de circulación provocado por un camión que transportaba madeira e que envorcou en Begonte cando circulaba pola A-6.

O sinistro produciuse ás 16,30 horas no punto quilométrico 525 da A-6 á altura da parroquia de Baamonde, segundo informaron os servizos de emerxencias.

O camión acabou envorcado despois do impacto contra unha furgoneta. En total, resultaron feridos os condutores de ambos os vehículos e outra persoa que viaxaba na furgoneta.

A carga do camión quedou esparexida pola vía, polo que o tráfico viuse afectado. Está previsto que un guindastre retire o camión accidentado, que invadiu os dous carrís da circulación en sentido A Coruña.