A Policía Local de Lugo localizou durante a mañá deste luns o condutor presunto causante dun accidente de circulación o pasado día 23 na capital lucense.
Segundo trasladou a Policía, o home ausentouse do lugar do incidente producido o domingo e foi localizado cando introducía o vehículo presuntamente implicado no accidente no interior dun garaxe. Ademais, acelerou a manobra cando observou a presenza policial.
Con todo, os axentes lograron interceptar ao mozo e comprobaron que perdera a vixencia da súa autorización administrativa para conducir, polo que, ademais de finalizar o atestado polo accidente de circulación, instruíronse dilixencias por un presunto delito contra a seguridade viaria.
FALTA DE RESPECTO AOS AXENTES
Por outra banda, tamén durante a mañá deste luns, mentres axentes da Unidade Territorial de Policía de Barrio regulaban o tráfico nas inmediacións da avenida de Ramón Ferreiro, un dos axentes dirixiuse a unha condutora que, segundo sinala a Policía, tiña o vehículo estacionado de forma incorrecta na confluencia das rúas Pintor Corredoira e Armórica e obstaculizaba a circulación dos demais.
Aínda que a condutora finalmente atendeu as ordes do axente, proferiu frases contra el como “é un imbécil”, motivo polo cal, ademais do correspondente boletín de denuncia por infracción ao Regulamento Xeral de Circulación, o policía realizou unha denuncia por infracción á Lei de Seguridade Cidadá.
LOCALIZADOS CANS AGRESIVOS
Ademais, a Policía Local de Lugo tamén informou de que localizaron os cans que, na noite do pasado mércores día 19, atacaron a varias galiñas na parroquia de Santa María Alta.
A propietaria dos animais deu aviso para facilitar a súa retirada por parte do Servizo de Lacería. Deste xeito, comprobaron que os animais, que coincidían coa descrición achegada pola persoa afectada, tiñan toda a documentación en regra.
A pesar de contar con todos os datos necesarios para calquera reclamación, a Policía comunicou que a persoa prexudicada, “nun principio”, renunciou a interpor calquera demanda.
