A Policía Nacional detivo por abandono de menor de idade aos dous pais dun neno de dous anos que se atopaba deambulando polas rúas de Lugo de madrugada. Os proxenitores, segundo informa o corpo de seguridade, foron atopados en estado de embriaguez.
Os feitos foron comunicados a través da sala do 091, á que diferentes veciños avisaron dun menor andando só pola rúa. Así, a Policía Nacional activou un operativo de procura coa colaboración da Local que permitiu atopar polo centro da cidade un carriño de bebé que tiña no seu interior diferentes envases de bebidas alcohólicas.
O menor foi localizado preto da Praza Maior, onde estaba coa súa nai e “nunha situación bastante precaria“, detaca o corpo. Por isto mesmo, os axentes procederon a trasladar o neno e a muller ao Hospital Universitario Lucus Augusti (HULA) para verificar o seu estado de saúde. En canto ao pai, outra dotación do operativo localizouno “tamén nun estado de embriaguez elevado”.
Dadas as circunstancias, a Policía buscou a algún familiar que se puidese facer cargo do neno unha vez dado de alta do hospital. Así, foi entregado a unha tía. Por tanto, os axentes procederon á detención dos dous pais por un delito de abandono de menor e á intervención do turismo que utilizaban para desprazarse e, posiblemente, para pasar a noite.
