Un home de 26 anos de idade foi detido nas inmediacións do recinto feiral das festas do San Froilán, en Lugo, tras ser visto por unha patrulla policial cando trapicheaba con droga.

O arrestro levárono a cabo axentes da Policía Nacional que participaban no dispositivo especial despregado con motivo da celebración do San Froilán.

Segundo informa a Comisaría luguesa, o mozo foi detido tras ser visto cando intercambiaba con outro home un obxecto pequeno “a cambio de diñeiro”.

Tras decatarse do sucedido, os axentes interceptaron ao suposto vendedor, que levaba encima unha bolsa con dez envoltorios que contiñan un po branco e que arroxaron un peso de dez gramos.

O mozo foi detido como autor dun delito de tráfico de drogas. Está previsto que pase a disposición xudicial este luns.

OUTRAS ACTUACIÓNS

Pola súa banda, a Policía Local formulou durante o fin de semana das festas un total de catro denuncias por delitos contra a seguridade viaria contra outros tantos condutores que excederon o límite legal no control de alcoholemia.

Así mesmo, outro condutor foi denunciado por circular sen carné e, ademais, os axentes da Local tiveron que inmobilizar a cabeza tractora que transportaba o escenario dunha das orquestras que actuaron na programación do San Froilán porque carecía dos permisos en vigor.