A Audiencia Provincial de Lugo confirmou a sentenza imposta por un xulgado de menores contra unha adolescente que agrediu e mordeu a outra moza despois de que esta tropezase con ela sen querer.

Os feitos que narra a sentenza remóntanse ao mes de abril de 2021 no parque Rosalía de Castro da cidade de Lugo, onde se atopaban ambas as novas. A acusada tivera un incidente previo coa vítima, despois de que esta tropezase sen querer con ela, “feito polo que xa lle pediu desculpas”.

No seu segundo encontro, a vítima volveu desculparse coa acusada, momento no que ela “a agarrou polo pelo, tirouna ao chan e deulle varias dentadas nas mans e no ombreiro esquerdo”, recolle o fallo.

O xulgado de menores, na sentenza agora confirmada, condena á acusada a seis meses de liberdade vixiada coa obrigación de someterse a programas educativos que “versen sobre o respecto aos demais, a resolución pacífica de conflitos e as consecuencias” deste tipo de actos.

Así mesmo, esixe á nova, hoxe maior de idade, que realice programas formativos e laborais que “faciliten a súa inserción sociolaboral” e que acuda á Unidade de Axuda a Drogodependencias da cidade.

A intención, apunta o fallo, é que a condenada “non volva cometer delitos” e que “reflexione sobre o intolerable” destes feitos, así como que “desenvolva a autorregulación emocional e o autocontrol, así como a capacidade de resolver conflitos de forma pacífica, o respecto aos demais e a asunción de responsabilidade derivada dos seus actos”.

Paralelamente, a condena a pagar unha multa de 1.651,10 euros, dos que 1.382,76 irán para a vítima da agresión e 268,34 para o sergas en concepto de asistencia sanitaria.