O festival Caudal Fest, que se celebra este venres e este sábado en Lugo, onde actuará unha vintena de grupos, vendeu o 80% das 30.000 entradas.
En concreto, serán máis de 20 grupos os que se subirán aos dous escenarios situados nas proximidades do Pazo de Feiras e do río Miño, en concertos que terán lugar pola tarde, noite e madrugada.
Tres bandas ou compositores encabezan o cartel deste ano, en que se recupera a normalidade tras dúas edicións alteradas pola pandemia: Izal, no “seu concerto despedida”; Robe, o cantante de Extremoduro, e Estopa. Ademais, pasarán por Lugo Morat e Cupido, entre outros.
Un dos promotores do festival, Iván Méndez, que tamén xestiona o Resurrection Fest en Viveiro, anticipa un novo “éxito” con esta terceira edición do Caudal Fest. Méndez tamén resalta que se venderon o 80% das entradas e que confía en “chegar ao cento por cento” antes do arranque do festival, este fin de semana.
Case un 60% das persoas que acudirán ao festival son procedentes de Galicia, un 30% do resto de España e tamén se prevé a presenza de público de Portugal e do sur de Francia.
A concelleira de desenvolvemento do concello de Lugo, outro dos organizadores, Ana González Abelleira, presumiu do “gran festival” que se vivirá en Lugo o fin de semana, nunha “contorna natural”. A última edición, antes da pandemia, deixou “un retorno económico para a cidade de 3 millóns de euros“, lembrou.
Este ano tamén participa a Xunta, a través do programa do Xacobeo. Unha cuestión que adiantaba a directora de Turismo, Nava Castro, sobre un dos escenarios do Caudal Fest, é que se traballa nun “turismo de festivais” a partir do próximo ano.
