A Policía Local de Lugo denunciou a un condutor que circulaba por Lugo sen un carné habilitante para conducir en España, ademais non ter seguro nin pasar a ITV. Igualmente, negouse a identificarse e rompeu ante os axentes a multa que lle deron.
Nun comunicado, a Policía Local sinala que sorprenderon de madrugada a esta furgoneta que circulaba pola Rúa das Fontes. Ao darlle o alto, o home negouse a identificarse, pois manifestou que chegou a España en patera e non contaba con documento identificativo.
Tras iso, deuse á fuga, aínda que foi localizado uns minutos máis tarde. O home presenta un permiso de conducir de Marrocos, o cal non lle habilita para conducir no Estado español, xa que excedeu o prazo regulamentario para realizar o cambio correspondente polo permiso, polo cal se procedeu a formular denuncia contra el, ademais de por non contar con ITV e seguro.
Así mesmo, o individuo tamén foi denunciado por unha infracción da Lei de Seguridade Cidadá, coñecida popularmente como a ‘lei mordaza’, pola negativa a identificarse e desobediencia aos axentes da autoridade, e logo por outra á Ordenanza de Protección Ambiental, posto que, cando os axentes lle fixeron entrega da documentación sancionadora, o home “rompeuna, lanzando os fragmentos ao chan, a pesar das advertencias dos policías para que non o fixese”.
