A alcaldesa de Lugo, Lara Méndez, anunciou este xoves a gratuidade do acceso ás piscinas exteriores de Frigsa durante o mes de agosto ante o informe desfavorable emitido pola Administración autonómica que impide habilitar unha zona de baño no río Miño.

“A entrada será gratuíta para todas as persoas, non queremos que ningún veciño deixe de ter a oportunidade de refrescarse este verán, un verán no que estamos a soportar vagas de calor con temperaturas especialmente altas”, explicou a rexedora.

Méndez insistiu na “discriminación” da Xunta con Lugo, ao “privar” aos veciños desta zona de baño pública “cando llo permite a numerosos municipios da contorna”. Por iso, a gratuidade das piscinas de Frigsa busca “habilitar alternativas”.

Ademais, a alcaldesa de Lugo anunciou que o Concello presentará alegacións ante a negativa da Xunta –o que tamén impediu á Confederación Hidrográfica Miño-Sil autorizar a praia fluvial– porque, segundo afirmou, os seus argumentos “non se sosteñen tecnicamente”.

O horario de apertura das piscinas de Frigsa é de luns a venres, de 12,00 a 20,30 horas, e sábados e domingos, de 12,00 a 20,00 horas.