A Audiencia Provincial de Lugo absolveu un home acusado dun delito de violación porque considera que non hai probas de que cometese os feitos.
Nun fallo con data do 11 de xullo de 2022, o tribunal lembra que nun delito contra a indemnidad sexual, onde non adoita haber testemuñas, o testemuño da vítima álzase como determinante para alcanzar a convicción condenatoria ou absolutoria por parte da sala. Neste caso, apunta que a denunciante variou a súa declaración sobre cuestións que o tribunal considera determinantes, como a posesión dunha navalla por parte do agresor ou os propios actos de agresión que se desenvolverían no domicilio.
Tamén menciona a sala que, “se a agresión, tal e como refire a denunciante, se produciu xa ao chegar ao piso, onde a conduciu á habitación onde a agrediu, e de aí ao salón, onde repetiu a agresión, se compadece mal coa existencia de polo menos unha cabicha que presenta ADN da denunciante, e que evidencia unha situación, polo menos temporal, de relax”.
Conclúen os maxistrados da Sección Segunda da Audiencia Provincial de Lugo que “o relato que leva a cabo a denunciante non se mantén uniforme ao longo do tempo, variando no plenario circunstancias que non poden tacharse de accesorias e que fan decaer a contundencia do relato”, o que os leva a alcanzar un pronunciamento absolutorio.
A sentenza é recurrible ante a Sala do Civil e Penal do Tribunal Superior de Xustiza de Galicia (TSXG).
