Axentes da Policía Local de Lugo denunciaron a sete gorrillas sorprendidos cando exercían a “conduta ilegal” de aparcacoches na zona do Hospital Universitario Lucus Augusti (HULA) de Lugo. Segundo informou a Policía Local, este pasado mércores efectivos da Unidade Territorial de Policía de Barrio estableceron un dispositivo especial para o control da “conduta ilegal de aparcacoches” na contorna do HULA, para o que empregaron vehículos policiais camuflados.

En concreto, tramitáronse sete actas de denuncia por infracción á ordenanza de Circulación, Regulamento Xeral de Circulación e Lei de Seguridade Cidadá. As mesmas fontes municipais indican que as persoas foron denunciadas ao ser sorprendidas cando realizaban a “conduta de invadir a calzada para indicar estacionamentos a condutores, ocasionando molestias e pondo en risco a súa integridade física”.