Axentes ambientais dependentes da Xunta de Galicia precintaron un niño de falcón peregrino localizado na cidade de Lugo para evitar que o proceso natural de cría se poida ver alterado ou prexudicado por factores externos. Para este fin, a Xunta comunicou que se procedeu a precintar os accesos ao niño, no que os axentes contabilizaron un total de catro ovos e que ao estar situado e a rolda do Carme, en pleno centro urbano, se atopaba exposto ao paso de veciñanza.
Así mesmo, a administración autonómica sinalou que o obxectivo da medida adoptada polos axentes é protexer o niño e impedir así que a xente poida acceder a el e garantir deste xeito que se complete o proceso de cría sen que nada altere a tranquilidade nin dos ovos nin do exemplar que adoita aniñar todos os anos na mesma zona.
O falcón peregrino está catalogado como unha especie silvestre en réxime de protección especial, unha lista na que se inclúen “aquelas poboacións merecedoras dunha atención e protección particular”, así como “aquelas que figuren como protexidas en directivas e convenios internacionais ratificados por España”.
Por outra banda, a Consellería de Medio Ambiente, Territorio e Vivenda, lembrou que intervencións deste tipo forman parte do traballo de seguimento e control sobre a fauna silvestre que corresponde aos axentes facultativos da Consellería, cuxa misión consiste en garantir o cumprimento da lexislación vixente respecto de todas aquelas materias que poidan afectar ou incidir sobre o medio natural.
