A Policía Nacional localizou en Miranda do Ebro a unha muller e o seu tres fillos cuxa desaparición fora denunciada pola avoa, que vinculaba o suceso coa exparella da súa filla, sobre a que pesaba unha orde de afastamento. Segundo o portavoz da comisaría de Lugo, Manuel Arias, a denuncia foi presentada o pasado venres, día 11 de marzo, e “temíase que podía estar involucrada a exparella da filla, que contaba cunha orde de afastamento”.

Ese mesmo día iniciouse unha investigación e o propio venres deuse co paradoiro da nai e os fillos. “Estaban os cinco xuntos, a parella e os tres fillos”, sinala o subinspector lucense. Segundo o relato de Arias, “a parella pensaba que a orde de afastamento non estaba vixente”, á vez que deslizaba que a “marcha foi voluntaria, aínda que a orde si que estaba en vigor”.

Os cinco membros desta familia foron localizados en Miranda de Ebro. No lugar, a policía, a instancias da comisaría de Lugo, procedeu á detención do home “por quebrantamento da orde de afastamento e foi posto a disposición xudicial”. A muller non presentou “ningún tipo de denuncia e quedou resolto o caso porque a marcha foi voluntaria e o único que houbo foi o incumprimento desa orde de afastamento”, puntualizou finalmente o portavoz policial. Arias descoñece si a familia segue en Miranda de Ebro, para repor, seguidamente, que son “libres” de estar en calquera lugar mesmo poderían estar de volta en Lugo.