O avogado da Fundación Amigos de Galicia, Pablo Lago, que levou a acusación popular no xuízo contra Ana Sandamil, declarada culpable polo xurado popular polo asasinato da súa filla Desirée en maio de 2019 en Muimenta, espera que a sentenza se poida demorar un mes. Con todo, defende que se lle impoña por este crime a prisión permanente revisable.
Lago advertiu que ve “complicado” que o fallo da xuíza se dea “nun curto prazo de tempo”. Ademais, este letrado apuntou que “é un procedemento no que se expuxeron moitas probas, foi complexo, duro e moi intenso”. “Entendo que no prazo dun mes, desde que se deu o veredicto, sería un tempo prudencial”, abundou.
No entanto, sinalou que tamén a sentenza podería estar “en menos tempo, xa que a xuíza estivo en todo momento pendente da proba e anotando cada unha das circunstancias que se foron dando na vista”. “Un mes sería un prazo prudencial”, incidiu. Paco Lago mostrouse convencido de que finalmente Ana Sandamil será condenada á prisión permanente revisable, petición que trasladaban todas as acusacións; Fiscalía e acusación particular tamén.
“NON HAI OUTRA OPCIÓN”
En canto á máxima pena reiterou que “non hai outra opción, non hai outra alternativa tendo en conta os feitos que se declararon probados e que foron obxecto do veredicto do xurado”. Paco Lago considera que se non se decreta prisión permanente revisable, podería ser condenada a entre 25 e 30 anos polo crime de Desirée. O pasado martes o xurado declarou na Sección Segunda da Audiencia Provincial de Lugo culpable, coa unanimidade dos nove membros, á nai da pequena de sete anos que foi achada morta na casa da proxenitoria en Muimenta.
