A alcaldesa de Lugo, Lara Méndez, avanzou a estratexia ‘Lugo Transforma’, que consistirá na entrada de capital municipal en empresas a través do fondo de investimento Torsa con máis de 12 millóns de euros, botará a andar “en abril”.
Lara Méndez compareceu este martes ante os medios informar o regulamento deste proxecto, que foi rexistrado o pasado luns no concello. “O que queremos é seguir adiante con ese proxecto que vai ser esencial no desenvolvemento da estratexia Lugo Transforma. Damos un paso máis, paso que é imprescindible para mobilizar os 12 millóns de euros de investimento municipal, a maior da nosa historia a través desa constitución dun fondo público emprendedor”, detallou.
O obxectivo é captar “novos investimentos con destino á cidade, con capacidade de atraer empresas e crear emprego estable e de calidade” a través da entrada temporal do concello “nos distintos proxectos empresariais, innovadores, baixo a modalidade de fondo de capital risco”, concretou.
Lara Méndez celebrou “a enorme expectación que xera” dita iniciativa “pioneira en Galicia a nivel municipal”, porque, a pesar de aínda non ser constituído formalmente, xa existen sobre a mesa 27 proxectos empresariais.
Son empresas que abarcan “os sectores da alimentación, da saúde, mobilidade, enerxía, xestión de residuos, aeronáutica, dixitalización, sector forestal e lácteo, proxectos procedentes de toda Galicia así como doutras comunidades como é o caso de Madrid, que buscan crecer en Lugo”, apuntou a alcaldesa.
Méndez reiterou que esta estratexia “trata de atraer e consolidar pequenas e medianas empresas que propicien un alto impacto social e ambiental no municipio nun prazo de cinco anos”.
A prioridade para acceder aos fondos, que non superará o dez por cento dos 12 millóns para unha mesma iniciativa, cínguese a proxectos relacionados con “tecnoloxía, biotecnoloxía, farmacia, biocombustible, loxística intelixente ou sector forestal”.
