As zanfonas máis antigas e representativas de Galicia chegan á rede. A Vicepresidencia da Deputación de Lugo vén de poñer a disposición de investigadores e músicos o Catálogo de Zanfonas Históricas de Galiza, un arquivo dixital co que o ente provincial pretende facilitar o acceso interactivo a información sobre 25 instrumentos datados entre os séculos XVIII e XX.
Estes instrumentos están conservados e custodiados tanto por institucións públicas como mans privadas, ente eles o Centro de Artesanía e Deseño de Lugo, o Museo de Pontevedra, o Museo do Pobo Galego, o o Museo de Belas Artes da Coruña, o Museo Massó de Bueu, o Museo Arqueolóxico Provincial de Ourense e a Fundación Santamarina Temes de Ourense. Para facilitar o acceso aos mesmos, o catálogo desenvolto polo Centrad ofrece unha galería de imaxes, un visor de 360 graos interactivo e arquivos métricos en formato .jpg e .dwg de cada un dos instrumentos, ademais de documentación sobre a súa procedencia e historia organolóxica.
Segundo expón o director da Colección de Instrumentos Musicais, Obxectos Sonoros e Arquivo Documental do Centrad e responsable deste arquivo dixital, Luciano Pérez, “o catálogo ofrece a posibilidade de tomar algunhas medidas básicas sen necesidade de acceder directamente aos intrumentos, evitando, por outra parte, o inevitable deterioro”. Ademais, incide, “este formato permite actualizar os contidos cada vez que teñamos infomacións relevantes”.
O arquivo, dispoñible neste enlace, recolle tamén parte do traballo desenvolvido e exposto no I Encontro Celme de Zanfona, organizado pola Vicepresidencia da Deputación de Lugo o pasado mes de setembro, coa participación de persoas investigadoras, mestres artesáns,
docentes e músicos. O deputado de Artesanía e Deseño, Efrén Castro, sinala que “con este catálogo dixital documentamos o coñecemento xenerado e compartido durante ese encontro e ofrecemos unha ferramenta útil para a investigación e a formación arredor deste instrumento milenario, avanzando no obxectivo de proxectar Lugo e o Centro de Artesanía e Deseño, nun espazo de referencia a nivel europeo”.
Segundo apuntan dende o mesmo ente, en Galicia a zanfona está intimamente ligada ao obradoiro-escola de instrumentos musicais, creado na Deputación de Lugo no ano 1951 por iniciativa de Antonio Fernández. Os seus primeiros directores, Faustino Santalices e Paulino Pérez, foron os artífices da súa recuperación na que, tamén, tivo un papel destacado o musicólogo Fernando López Acuña. “Arredor do obradoiro, agora integrado no Centrad, desenvolveuse unha intensa actividade relacionada co patrimonio musical galego, e especialmente coa zanfona”, explican.
