Lugo presentouse este xoves na Feira Internacional do Turismo (Fitur) levada a cabo en Madrid como unha “provincia de cinema”, para impulsar o turismo a través do audiovisual. Nun acto celebrado na caseta de Turespaña, o presidente da Deputación de Lugo, José Tomé Roca, puxo en valor o modelo turístico, “sustentable, non masificado” e cunha oferta diversificada que propón a provincia.
Ademais da historia, as paisaxes e a gastronomía, entre outros encantos da provincia, agora incorpórase “entre as múltiples opcións” dispoñibles o turismo ligado ás rodaxes, “buscando a complicidade da ilusión, o dinamismo e a maxia” que “sempre supoñen” as producións audiovisuais.
“Somos a provincia galega con máis rutas, a provincia máis diversa de toda España. Sumamos aos nosos grandes monumentos románicos, á nosa costa e á Terra Chá agora tamén o turismo ligado ás rodaxes”, reivindicou o presidente provincial.
Para a presentación, a Deputación de Lugo contou coa participación de diferentes profesionais do sector relacionados coa provincia, como o presidente e fundador de CTV, Ghaleb Jaber Ibrahim; o produtor de Gaitafilmes, Suso López, e o produtor audiovisual de Amanita Films e codirector do festival FanCine, Iván Patiño. Todos eles explicaron o potencial de Lugo neste ámbito, tanto de creación como de estudio de cinema.
“Buscar a interrelación entre a produción audiovisual e o turismo pode converterse, sen dúbida, nun factor de desenvolvemento para o rural”, explicou José Tomé, que puxo de exemplo diferentes films que levan por todo o mundo a Lugo, como ‘O sabor das margaridas’, serie coñecida mundialmente grazas a estar dispoñible na plataforma Netflix.
O presidente asegurou que o turismo é un factor de equilibrio territorial, xa que é un sector capaz de xerar emprego de calidade que permite aos mozos do rural desenvolver proxectos de vida nos seus lugares de orixe. “Do mesmo xeito que o cinema é un diálogo entre o creador e os espectadores, o turismo é un encontro entre o que chega e o que vive habitualmente nun lugar”, engadiu José Tomé Roca.
Baixo o slogan ‘Lugo, Provincia de cinema’, Tomé Roca quixo resaltar que as rodaxes teñen un retorno económico directo para a zona, que se multiplica cando se estrean as películas ou series de éxito, como ‘Doghs’, ‘O que Arde’ ou ‘Live is Life’, que atraen a visitantes.
