O presidente da Deputación de Lugo, José Tomé, celebrou o seu acordo co alcalde de Castroverde, José María Arias, para o proceso interno de renovación da dirección do PSOE provincial de Lugo ao soster que demostra que “triunfou a provincia por encima de calquera interese persoal ou de partido que puidese ter cada un”.
O tamén alcalde de Monforte considera que o evitar a primarias axudará a “consolidar as alcaldías e mellorar resultados de face a adquirir algunha máis”. A pesar das diferenzas que puidese haber “previas” ao acordo, “no substancial” si coinciden entre os dous e destaca: “Somos compañeiros, traballamos xuntos, cremos nos alicerces nos que se sustenta a política de Pedro Sánchez, arroupamos a Valentín e traballaremos sobre as mesmas liñas mestras”.
O proceso para xestar este acordo foi “discreto” e “fácil” porque “existe unha boa relación e comunicación” entre ambas as partes. “En ningún momento falamos de persoas, nin de José María nin de Tomei, se non dun proxecto común e cando se fala de proxectos é moito máis sinxelo entenderse”, afirmou.
Nunha das súas última aparicións en público, o que será agora vicesecretario xeral, José María Arias, deixaba claro que non lle gustaba aglutinar varios cargos nunha mesma persoa, como é o caso de José Tomé. Con todo o alcalde de Monforte, presidente da Deputación e cabeza de lista provincial quita ferro ao asunto e chancea: “Se Jacques René Chirac puido ser alcalde de Paris e presidente de Francia, os demais tamén poderemos facelo”.
Na mesma liña, a alcaldesa de Lugo, Lara Méndez, festexa a unión do equipo provincial e ve neste acordo un paso de face ao avance da consolidación do partido en Lugo. “Para nós o municipalismo é fundamental, porque é a administración máis próxima aos veciños e veciñas, e estou segura de que a unión entre Tomei e Arias reforzaranos máis”, reflexiona Méndez.
