Dous menores de idade foron identificados o pasado mércores despois de roubar un bastón e unha cuncha de peregrino dunha tenda situada no centro histórico de Lugo. Segundo informa a Policía Local de Lugo este xoves, os menores, de 13 e 14 anos, foron localizados no parque Rosalía de Castro cos obxectos subtraídos despois da denuncia realizada polo responsable do establecemento.

Os axentes, tras requirir a presenza dos pais dos menores, abriron dilixencias ante un posible delito de furto. Ademais, patrullas da Policía Local interviñeron en dous establecementos de lecer nocturno onde se incumprían as normativas vinculadas ao control da pandemia.

No primeiro, os axentes formularon dúas denuncias por infraccións á Lei galega de Saúde debido a que o local estaba aberto fóra de horario e “o seu responsable non requiría aos clientes a presentación de certificado covid, proba diagnóstica ou certificado de recuperación”.

No segundo establecemento abríronse catro denuncias pola ausencia dun letreiro informativo sobre o aforamento máximo permitido, non requirir certificados aos clientes, exceder o horario e carecer de medidor de CO2.