Golpe ao plan do Concello de Lugo para ampliar o polígono do Ceao. O proxecto do consistorio lucense para crear unha nova urbanización industrial na parte norte da cidade, entre o centro comercial das Termas e o Polígono O Ceao, vén de chocar coa oposición da Xunta de Galicia, que, segundo Adega, cuestiona a viabilidade ambiental dun proxecto que afectaría a unha zona de “salientables valores”.
E é que, segundo apuntan dende a Asociación, na zona proxectada para a construción do novo polígono industrial atópanse “varias nacentes do río Rato”, á parte de existir “abundantes formacións de bosque de ribeira e carballeiras”. Con todo, un dos principais argumentos achegados pola Dirección Xeral de Calidade Ambiental para desestimar o proxecto orientaríanse a unsuposto risco de inundabilidade, xunto coa “falta de integración topográfica e paisaxística”.
É por isto que, segundo Adega, o informe da devandita Dirección Xeral xulga que “a ordenación formulada supón unha ameaza directa sobre algúns destes valores” e “pode dar lugar a efectos ambientais significativos”, enténdese que adversos. Estas cuestións derivarían nun condicionamento da tramitación do Plan a unha xustificación da “necesidade” de urbanizar o ámbito, entre outras barreiras legais que ameazan con facer caer o plan.
Adega, Ríos con Vida e a Asociación do Parque de Rosalía de Castro xa presentaran alegacións denunciando a “insustentabilidade” e “irracionalidade” da nova urbanización industrial proposta no contexto actual; xa que, segundo destacan, existe unha grande superficie de solo industrial no Concello -máis de 125 Has.- con planificación xa aprobada, “a cal se atopa xa urbanizada e/ou en espera dunha próxima urbanización, suficiente para a implantación deste tipo de actividades durante décadas”. “Así mesmo, nas alegacións puxéronse de manifesto as consecuencias negativas derivadas da execución do Plan, como os danos irreversibles á rede fluvial e aos hábitats naturais”, finalizan.
