Detectado un pequeno tremor de terra en Friol

Pouco antes tivera lugar outro en Piñor, Ourense.

Sismo detectado en Friol | Instituto Xeográfico Nacional

O Instituto Xeográfico Nacional detectou na tarde noite do martes dous movementos sísmicos de baixa intensidade que afectaron Friol e Piñor (Ourense) con 20 minutos de diferenza.

O primeiro produciuse a cero quilómetros de profundidade en Piñor minutos antes das 21,00 horas da noite do martes; mentres que o de Friol tiña lugar 20 minutos despois a unha profundidade de dous quilómetros.

Os tremores rexistraron unha magnitude de 2,7 e 2,8, respectivamente. O 112 Galicia sinala que o seu central de emerxencias non recibiu ningunha chamada para alertar da existencia de incidencias relacionadas con estes episodios. De feito, o sismo de Friol apenas se percibiu dende a superficie, segundo asegura o rexedor local, José Ángel Santos.