A Deputación de Lugo informou de que este luns comezaron os traballos de limpeza e desinfección con carácter preventivo que se realizan nos catro centros de atención a maiores do organismo provincial, situados nos concellos de Pol, Trabada, Ribadeo e A Fonsagrada.

Con esta medida, a Deputación busca “extremar as precaucións para minimizar o risco de contaxio nas residencias, tanto das persoas maiores usuarias como dos profesionais que as atenden”.

Os labores de desinfección desenvolveranse, polo menos, mentres permaneza o estado de alarma. Cada un dos centros limparase dúas veces á semana e os traballos faranse de forma exhaustiva, tanto no interior como no exterior dos edificios.

OUTRAS MEDIDAS

Desde antes da declaración do Estado de Alarma, os catro centros de atención a maiores da Deputación implantaron un protocolo específico de medidas contra o COVID-19 elaborado por persoal técnico da área de Promoción Económica e Social, baseado e en cumprimento da normativa, instrucións, protocolos ou guías publicadas polas autoridades competentes.

Entre esas medidas, atópase a prohibición de visitas de amigos e familiares, e tamén o reforzo do servizo de limpeza, prestando especial atención ás zonas de acceso e saída dos sectores de illamento, escaleiras, portas, ascensores, zonas de deambulación, entre outras, para reducir o risco de transmisión.