Un funcionario do Centro Penal de Bonxe, na provincia de Lugo, foi o primeiro en dar positivo por coronavirus deste colectivo en Galicia, segundo informaron a EFE fontes da Secretaría Xeral de Institucións Penais.

As mesmas fontes precisaron que o funcionario traballou por última vez no centro penal de Bonxe o pasado 10 de marzo. Tras atoparse mal, fóronlle realizadas as probas de coronavirus e deu positivo, polo que, de forma inmediata, adoptáronse as correspondentes medidas de precaución para evitar a propagación do virus.

En España deron positivo a día de hoxe un total de 22 traballadores de institucións penais e 2 internos.

Desde a Secretaría Xeral infórmase de que as instrucións son, “ante a sospeita dun posible caso de coronavirus, de que se lles realicen aos funcionarios de prisións os test correspondentes o máis rápido posible”, precisamente porque traballan “cun colectivo”, o dos presos, que se considera “fráxil”. Trátase, aclaran as mesmas fontes, de “protexer aos traballadores”, porque así tamén “se protexe aos internos”.