O avogado da xuíza Pilar de Lara, Agustín Azparren, confirmou que xa saíu a concurso público a praza para o Xulgado de Instrución número 1 de Lugo, que ocupaba a maxistrada ata o momento no que se fixo firme a sanción polo Consello Xeral do Poder Xudicial (CXPX). Azparren criticou a “gran velocidade” coa que iso sucedeu, aínda sen resolverse o recurso presentado.
En concreto, Azparren refírese ao recurso de reposición presentado ante o Tribunal Supremo no que se solicita a non execución da sanción de sete meses e un día, que implica perda de destino. “Parece que aquí van con gran velocidade, sen esperar a que se resolva o recurso de reposición”, afeou o avogado que representa a Pilar de Lara no expediente sancionador.
Enfrontou isto á rapidez coa que se produciu o cesamento da propia maxistrada, sobre o que lembrou que ocorreu de “forma estraña, sen orde de cesamento ninpublicación no boletín”.
No entanto, e aínda que considera “improbable” que o recurso sexa favorable aos intereses da xuíza, haberá “que esperar uns días” para ver que dita o Tribunal Supremo e valorar se se é posible “rectificar”. Malia iso, “non deixaría de ser un inconveniente porque habería que facer unha rectificació no BOE e retirar a praza”, recoñeceu o avogado.
“Suponse que o recurso de reposición se resolverá probablemente nestes días”, incide Azparren, quen insistiu en que “non deixa de ser estraña” tanta “celeridade” para sacar a concurso público a praza para o Xulgado de Instrución número 1 de Lugo, no que permaneceu os últimos doce anos Pilar de Lara como responsable do mesmo, entre 2007 e principios de 2020.
