Axentes do Corpo Nacional de Polícia (CNP) imputaron por un delito de furto a un veciño da cidade de Lugo como sospeitoso da desaparición de 15.000 euros no local de hostalaría no que traballaba como camareiro, na zona de Augas Férreas, na propia capital lucense.
A desaparición do diñeiro foi denunciada polos propietarios do negocio o pasado 14 de novembro, aínda que os feitos se produciron en realidade entre os meses de abril e novembro, coa desaparición duns 10.000 euros no establecemento e o furto de 5.000 euros que estaban gardados nun sobre na oficina do local.
Para facerse con ese diñeiro, segundo aparece reflectido nas cámaras de seguridade do establecemento, o sospeitoso “non marcaba na caixa rexistradora as consumicións que servía”, de modo que á “hora de cobrar”, o camareiro supostamente quedaba esas cantidades para si.
Co ánimo de non levantar sospeitas, sosteñen os investigadores, facía “o paripé diante da caixa rexistradora”, porque mentres “suxeitaba o diñeiro para cobrar cunha man, coa outra manipulaba a máquina para que dese a impresión de que realmente estaba a cobrar as consumicións.
Noutras ocasións, precisa a Comisaría Provincial nun comunicado, o sospeitoso supostamente “borraba do rexistro importes de consumicións que xa estaban anotadas, para así poder retirar” esas cantidades “no seu beneficio”.
Para dar coa persoa que estaba a realizar eses “desfalcos”, o “denunciante puxo cámaras de seguridade en todos os recunchos” do local e comprobou que os “furtos se producían a diario”. Así, tamén puido comprobar que o sospeitoso entrou na oficina do local, cunha chave que tiña, e se fixo cun sobre que contiña 5.000 euros.
Por outra banda, os investigadores do caso tamén lograron esclarecer outro furto que ocorreu o pasado mes de xuño no lugar onde o sospeitoso ten o seu domicilio, no que desapareceran 10.000 euros que estaban gardados nunha caixa de caudais.
As dilixencias foron remitidas ao Xulgado de Garda.
