A Policía Local de Lugo auxiliou durante a pasada ponte de decembro a unha muller que inxerira “altas doses” de pastillas para quitarse a vida, así como a outra que estaba tirada na rúa en estado de embriaguez.

Segundo relatou a Policía Local, o pasado venres día 6 ás 14,10 horas unha patrulla da Unidade Territorial da Policía de Barrio acudiu a unha vivenda na cidade de Lugo co fin de auxiliar a unha muller que, segundo indicou un familiar, “pretendía quitarse a vida tomando altas doses de pastillas”.

Por iso, a patrulla personouse no lugar en compañía dunha ambulancia do 061, dotada de facultativo médico e unha psicóloga, que procederon a tranquilizar a situación e adoptaron “as medidas necesarias para garantir a saúde da persoa”, comentaron as mesmas fontes.

Por outra banda, axentes auxiliaron sobre as 15,10 horas do domingo día 8 de decembro a unha muller que estaba tirada na Avenida da Coruña na cidade de Lugo, supostamente como consecuencia do “estado de embriaguez” no que se atopaba, sinalaron as mesmas fontes policiais.

Por iso, os axentes requiriron a presenza dunha ambulancia, debido a que presentaba “un estado severo de nerviosismo“, polo que, concretan as mesmas fontes, tivo que ser inmobilizada nunha padiola para o seu “traslado seguro” ao Hospital Universitario Lucus Augusti (HULA) de Lugo.