A Fiscalía pide seis anos de prisión para unha muller acusada de contraer matrimonio de forma ilegal e de estafar ao seu marido con esquizofrenia durante o catro anos que durou o matrimonio. O xuízo celebrarase o vindeiro mércores ás 10,00 horas na sección segunda da Audiencia Provincial de Lugo.

A presunta autora dos feitos coñeceu á suposta vítima no bordel de Lugo no que se prostituía. Mantiveron un “breve período de relacións no que nunca conviviron” e casaron o 9 de xullo de 2007. Cando se coñeceron, el vivía cos seus pais e desde os 45 anos presenta un patrón de esquizofrenia paranoide, cunha intelixencia inferior ao límite normal, sen capacidade afectiva e cun grave problema para prestar consentimento matrimonial.

Así o relata o documento do Ministerio Fiscal, no que tamén se explica que a muller casou co home para “conseguir a legalización da súa estancia en España e apoderarse dos seus ingresos”. De feito, a presunta vítima “acudía unha vez por semana ao prostíbulo” e “pagáballe” como outro cliente máis pola relación sexual.

Ademais, os pais del non aprobaban a relación e só en contadas veces ambos acudiron xuntos ao domicilio do outro. Con todo, compartían conta bancaria e pediron dous créditos, un de 11.479,92 euros e outro de 13.571,43 euros que “foron acaparados pola acusada e remitidos a Brasil”.

Por outra banda, o home posuía “ingresos procedentes da gandaría, e unha pensión da Xunta de 575 euros, diñeiro que na súa maior parte entregaba” á muller, por un valor total de 30.000 euros.

En consecuencia, a Fiscalía declarou nulo o matrimonio e argumentou “falta de válido consentimento”, xa que o marido “presentaba un índice de intelixencia” inferior “ao normal” e “dependencia emocional absoluta” da acusada. Por todo iso, o Ministerio Fiscal solicita cinco anos de prisión por un delito de estafa e un ano de prisión por un delito de matrimonio ilegal. Ademais, piden o pago de 30.000 euros á presunta vítima e unha multa de 4 euros diarios durante once meses pola estafa acometida.