InicioEconomíaO insostible cemiterio de vehículos de Lugo

O insostible cemiterio de vehículos de Lugo

O depósito municipal está ateigado con 150 vehículos – Cada ano unha cantidade similar chega aos desguaces – O servizo de grúa atópase en situación irregular

PUBLICADA O

- Advertisement -

A semana pasada, a xunta de goberno de Lugo aprobou o procedemento de licitación da subasta de 56 vehículos abandonados. O lote, cun prezo mínimo de venda de 6.720 euros, é un máis dos que desfilaron nos últimos anos dende o depósito municipal cara o desguace. As instalacións están ateigadas, ata o punto de que conviven no mesmo espazo os vehículos retirados por infraccións e os que quedaron á súa sorte nas rúas lucenses. Hai 150 coches, furgonetas e camións. Apenas entran máis.

Aínda que resulte sorprendente, esta é a situación habitual no depósito municipal. Son demasiadas as ocasións en que os propietarios renuncian a recoller os vehículos para non ter que pagar a estancia nas instalacións, as multas e os desperfectos. Canto máis tempo pasan nesta nave do polígono de O Ceao, menor é a posibilidade de que o dono pague as taxas e poida retiralo. Esta dinámica obriga ao Concello a desfacerse do material por unha fracción mísera do seu valor orixinal. Agora serán 50, pero os outros 100 agardan o mesmo destino.

Interior do depósito municipal de vehículos de Lugo | OB
A parte posterior do depósito municipal de vehículos a vista satélite | Google

Un servizo de retirada moi cuestionado

As grúas son operadas por Cechalva, filial de Vendex, que obtivo o contrato en 2005. Coma recoñeceron no executivo local, era un contrato sobredimensionado, a pesar do cal foi prorrogado en 2015. A medida tivo a súa polémica, pois a empresa está no sumario da Operación Pokémon por supostos sobornos a políticos no proceso de contratación. Para entón xa existía un acordo para a remunicipalización do servizo, un proceso que segundo a alcaldesa Lara Méndez levaría tempo.

O contato expirou en 2016 e polo tanto as dotacións son municipais. Coa obxección do interventor, o goberno socialista segue a pagar á empresa polo servizo de retirada, malia que o mantemento do material e das instalacións corresponde ao Concello. Segundo a fórmula actual, Cechalva percibe case medio millón de euros anuais, pois é a corporación quen asume o déficit do servizo. Noutras palabras, é un contrato demasiado grande para o número de vehículos que son recollidos en Lugo, unha media de 2,5 diarios.

Dende que expirou a licitación, o servizo leva dous anos nun limbo administrativo, e sen solución á vista. A oposición insiste en que o contrato é excesivo, como demostra o escaso quilometraxe da plataforma especial para a retirada de automóbiles. Con todo, o municipio conta cos medios de transporte e almacenaxe –que Lugonovo pide trasladar ao vello matadoiro ou aos terreos que limitan co edificio da Policía Local–, polo que instan a formalizar un novo contrato que poida dotalos de persoal propio.

ÚLTIMAS

A Deputación de Lugo culpa á Xunta de “incumprir” o proceso de estabilización e esixe o fin da “temporalidade”

O pleno da Deputación Provincial de Lugo aprobou este martes unha moción do Grupo Provincial Socialista...

Remite o temporal que deixa moita neve, inundacións e estradas cortadas en Lugo

Os efectos do temporal remitiron nas últimas horas en Galicia, cun descenso no volume de precipitacións...

A neve dificulta a circulación en Lugo e os camións non poden circular pola LU-633 en Pedrafita do Cebreiro

A caída de neve dificultou a circulación na provincia de Lugo e, en concreto,...

Desestimada a demanda da irmá dunha muller asasinada por mal funcionamento da Casa da Muller de Lugo

O Xulgado do Contencioso-administrativo número 2 de Lugo desestimou a demanda presentada pola irmá da muller...