A Xunta de Galicia iniciou este mércores as obras do último tramo para completar a autovía entre Lugo e Sarria, cun orzamento de 37,7 millóns de euros. A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Lugo, Alfonso Villares, visitou este mércores o comezo destes traballos.
Segundo detallan nun comunicado, a actuación contempla o desdobramento para converter en autovía o tramo do actual corredor que arrinca na glorieta de Nadela e finaliza na ligazón da Pobra de San Xiao, onde conecta co tramo posto xa en servizo no 2022. Son, en total, 13,5 quilómetros de percorrido e a nova autovía pasará a denominarse AG/AG-22, sendo libre de peaxe.
A conselleira reivindicou a envergadura deste proxecto, que contempla varias actuacións singulares, entre elas os dous viadutos que se construirán sobre o río Chamoso e Neira, o primeiro de 259 metros de lonxitude e o segundo de 160 metros. A isto hai que sumar as ligazóns do Corgo e Maceda, un cruzamento de vía baixo a A-54, así como a ampliación de 13 pasos superiores e sete inferiores.
O prazo de execución das obras será de 36 meses e os traballos comezaron xa coas primeiras intervencións de sinalización e roza na contorna onde se construirá o futuro viaduto sobre o río Chamoso, que discorrerá paralelo ao actual.
A infraestrutura, que se calcula que terá un tráfico de 8.000 vehículos diarios, beneficiará a unha poboación de 100.000 persoas dos concellos de Lugo, O Corgo e O Páramo, ademais de transportistas e visitantes.
Sobre isto, a conselleira remarcou que a actuación mellorará a seguridade viaria e permitirá acurtar tempos de viaxe. A nova autovía, que terá unha limitación de velocidade de 120km/h, fará máis cómodo o desprazamento entre Lugo e a comarca de Sarria, conectando de maneira máis eficiente cos grandes eixos (A-6 e A-54) que conflúen en Nadela.
INVESTIMENTOS EN VÍAS DE ALTAS PRESTACIÓNS
Por outra banda, Allegue destacou o compromiso da Xunta “cunha folla de ruta clara” para seguir sumando cada ano novos quilómetros nas vías de altas prestacións na comunidade, ademais de seguir investindo en conservación.
A este respecto, apuntou que a día de hoxe as actuacións en marcha en Galicia en vías de altas prestacións suman 170 millóns de euros de investimento, que se destinan á prolongación da AG/AG-59 Santiago-A Estrada; á VAP Tui-A Guarda; á prolongación da autovía da Costa da Morte e ao desdobramento dun treito da estrada Brión-Noia para convertelo en autovía.
“Damos outro gran paso no marco do noso compromiso para seguir mellorando a seguridade, a conectividade e vertebración do noso territorio e con iso a competitividade económica nesta comarca lucense e en toda Galicia”, concluíu.
