A Xunta revogou a autorización administrativa e a aprobación do proxecto de execución do parque eólico Fonseca (Pousadoiro-Fonseca fase II), emprazado nos concellos da Pontenova, Riotorto e Meira. Así figura na resolución publicada no Diario Oficial de Galicia (DOG) este martes, a cal asina a directora xeral de Enerxías Renovables e Cambio Climático, Paula Uría, que arquiva o expediente.

A primeira solicitude de autorización administrativa do parque remóntase a 2004, nun procedemento que rexistrou diferentes autorizacións co paso dos anos. En  2017, a promotora comunicou o cambio de denominación social, de Gamesa Enerxía a Siemens Gamesa Renewable Energy Wind Farms. Xa en 2020, a compañía solicitou á Xunta que se declare a vixencia da declaración de impacto ambiental, pois entende que as obras de instalación xa foron iniciadas antes da lei 21/2013. Finalmente, a Xunta revoga en xaneiro de 2026 as autorizacións concedidas a esta compañía.