Comisións Obreiras acusou á CIG de aceptar un convenio “por baixo do salario mínimo” para o sector da limpeza na provincia de Lugo. Tras a firma, ratificada en asemblea o pasado xoves, do acordo subscrito entre o sindicato nacionalista e a patronal co que se puxo fin a catro meses de folga, Comisións Obreiras emitiu un comunicado no que censura a “clara contradición da CIG”.
Sostén que o convenio asinado en Lugo “deixa por baixo do SMI do 2024 (15.876 euros brutos anuais) as categorías de persoas limpadoras e peóns especializados”.
CC.OO. di que o salario anual de limpador este ano “será máis de 800 euros inferior ao SMI” e que un peón limpador “cobrará 300 euros menos, en total 15.567,05 anuais”.
“Só naqueles casos en que teñan un ou dous trienios de antigüidade chegarán ao salario mínimo”, aseverou Comisións, que acusa á CIG de “apoiar a postura da patronal de diferir a aplicación deste incremento por medo a que as empresas non cumpran”.
