O próximo luns, 1 de febreiro, os empregados e empregadas da Deputación de Lugo volven progresiva e gradualmente ao traballo presencial. O cadro de persoal, que se atopaba realizando as súas funcións dende o domicilio na modalidade non presencial, pasará a realizar traballo presencial en quendas estables do 50% dos efectivos de cada servicio. Esta decisión foi tomada dentro da política da institución provincial de anticipación e prevención na loita contra a Covid-19.
A deputada Pilar García Porto subliñou que “estas medidas establecéronse co fin de preservar a seguridade e a saúde dos empregados e empregadas e da propia cidadanía á que se presta servizos”. Tamén que, dende a institución provincial continuouse prestando os servizos públicos con normalidade e fluidez durante este período.
A institución provincial asinou o pasado luns 18 de xaneiro un decreto no que se recollía un conxunto de medidas como reducir ao imprescindible a presencia do persoal nas dependencias provinciais entre o 18 e o 31 de xaneiro, priorizar as reunións a través de plataformas telemáticas, a cancelación dos actos públicos ou o peche das dependencias ao público. Ademais, durante este período, as Xuntas de Goberno, as comisións informativas e a propia sesión plenaria de xaneiro celebráronse vía telemática.
ATENCIÓN TELEFÓNICA
A institución provincial tamén abre de novo, a partir do luns 1 de febreiro, as súas dependencias á cidadanía para a atención cidadá. Pese a esta medida, darase prioridade á atención por vía telefónica ou telemática, evitando así os contactos e reducindo a posibilidade de transmisión do virus. A atención presencial realizarase mediante cita previa.
