Dende o inicio da pandemia pola Covid-19, na provincia de Lugo pecharon máis de cen bares entre os 3.000 que hai, cifra na que tamén se inclúen os locais de lecer nocturno.
Así o sinalou este luns o presidente da Asociación Provincial de Empresarios de Hostalaría de Lugo, Cheché Real, quen incidiu en que “poderían ser máis de cen, coa consecuente destrución de emprego” que iso implica. Segundo puntualizou, estes datos serán máis “fiables” na primeira quincena de xaneiro.
Ademais, Real fixo fincapé na “transversalidade tremenda” da hostalaría, pois “arrastra a outros sectores e iso ponse de manifesto nas cidades e pobos onde a hostalaría está pechada”. “Acabouse o dinamismo e a frecuencia diaria de visitas aos comercios. Non hai esa alegría, mesmo hai medo. A situación é moi difícil”, advertiu o presidente desta asociación.
Os empresarios de hostalaría de Lugo participarán este martes na protesta convocada en Santiago de Compostela para “mostrar a indignación e toda a situación que atravesa o sector da hostalaría e o turismo”.
Na manifestación, sinalou Cheché Real, tamén “se porá de manifesto a situación que atravesa o aloxamento” que, malia non ter que pechar obrigatoriamente, está a verse afectado polos peches perimetrais e confinamentos.
