O presidente da Federación Galega de Comercio, José María Seijas, vaticinou un “caos” para o comercio da Mariña e o comercio da provincia lucense se finalmente pecha a factoría de Alcoa en San Cibrao.

Así, Seijas asegurou que “non cabe dúbida que tal e como están as circunstancias isto sería un novo puntillazo para o comercio da Mariña e non só da Mariña, senón para o comercio da provincia”.

“Hai que ter en conta que economicamente o de Alcoa é unha porcentaxe moi importante na economía (un 30 por cento do PIB de Lugo) e se non vai para adiante vaise a notar. As consecuencias serían nefastas nun curto prazo de tempo”, comentou.

O empresario lucense constatou que “os comerciantes” desa comarca “teñen moito medo, saben que se non vai para diante (a venda a Liberty ou a intervención do Goberno) o peche de moitos negocios é case seguro“, abundou. “Isto suporá un caos, e desaparecerán un bo número de negocios”, aventurou.

En canto a unha posible intervención, José María Seijas apela a que viu “estes días” o que “dicía a ministra de Traballo (Yolanda Díaz) que estaban niso” (solucionar o problema da factoría de San Cibrao). “Pero se son sincero o que diga esta señora hoxe, mañá non é verdade“, lamentou.

“Estamos á espera coa ilusión de que se busque unha solución e que podamos continuar con esta actividade (produción de aluminio), que é unha actividade tamén moi importante para o resto de España”, concluíu.