A Consellería de Medio Ambiente puxo a disposición das empresas interesadas catro parcelas de chan industrial no polígono lucense das Gándaras. A superficie total supera os 33.000 metros cadrados. Estes solares están incluídos no concurso que convocou a empresa pública Xestur o pasado 10 de febreiro e en virtude do cal os adxudicatarios se beneficiarán dunha bonificación do 50% aplicada pola Xunta sobre o prezo de venda oficial.
Así o indicou este martes a conselleira Ángeles Vázquez en Lugo, onde participou nun evento convocado pola Asociación de Empresarios do Polígono do Ceao e das Gándaras para falar da dispoñibilidade actual de chan para novos proxectos, así como dunha ampliación de superficie de uso empresarial de cara ao futuro.
Nesta materia, a Xunta sacou un novo concurso para a venda de 770.000 metros cadrados de chan empresarial en 17 parques da súa propiedade, un deles o das Gándaras, onde se ofertan catro parcelas con 33.606 metros cadrados e un prezo de venda sen bonificar de 3.192.570 euros, polo que as empresas que se fagan con estes solares beneficiaranse dun aforro estimado en case 1,6 millóns de euros.
Ademais das bonificacións do 50% aplicadas pola Xunta, a conselleira explicou aos empresarios do Ceao e As Gándaras que os interesados tamén teñen a opción de adquirir chan en réxime de dereito de superficie, unha modalidade mediante a cal os adxudicatarios abonan un canon anual equivalente ao 1,5% do prezo da parcela sen bonificar durante os dous primeiros anos. O prazo de presentación de ofertas termina o 10 de marzo.
AMPLIACIÓN DO POLÍGONO
Por outra banda, a conselleira e os representantes do sector empresarial das Gándaras tamén falaron da ampliación do polígono, cuxa primeira fase se abordará este ano e permitirá que unha soa empresa ocupe unha superficie de 25.000 metros cadrados. Tamén se prevé a construción de camiños interiores, unha rotonda e a urbanización de aproximadamente a metade da parcela correspondente á seguinte fase da ampliación.