A Veiga, en Muras, acolle este sábado 25 de maio unha enxebre festa na que se reivindica e poñen en valor os oficios e a vida no rural. Durante todo o día haberá un Mercado Rural Agroecolóxico e unha ‘Mostra de Oficios” con dezasete artesáns que darán a coñecer o seu labor noutras tantas disciplinas como son a escultura en pedra, a elaboración de instrumentos musicais, a cestería, a madeira, a forxa, a confección do traxe tradicional, a lá, o coiro, a xoiería ou os xoguetes tradicionais.
Falamos con Manuel Requeijo, Alcalde de Muras, sobre esta mostra.
Como naceu a Romaxe Artesá da Chaira?
Dende o Concello de Muras sempre apostamos pola posta en valor dos oficios tradicionais como proposta para a dinamización do rural, intentamos facelo de maneira modesta e coido que ano tras ano avanzamos neste senso, a iniciativa xorde dunha proposta dos Obradoiros Artesáns da Terra Cha aos que lles estamos moi agradecidos por pensar en nós e ofrecernos unha idea con tanto potencial.
Con esta celebración buscades que artesanía sexa a protagonista da festa e non un complemento como pasa en moitos casos. É esa a intención?
Buscamos que sexa un revitalizante que a través do proceso artesanal se recuperen procesos mais ecolóxicos e se volva a creación propia, sentida, sen ser un proceso mecánico, ademais de potenciar o desenvolvemento rural a través da recuperación de oficios, que ano tras ano nos demostran os artesáns que é posible.
Hai tradición artesanal no Concello de Muras?
Perdeuse, si houbo moito zoqueiro, ferreiro, cesteiros. Sobre todo, moita xente dedicada a carpintería, pois non había outra maneira de proverse de material para traballar o campo e a gandería.
A ‘Romaxe Artesá’, un ‘mix’ de feira e festa ou nada que ver?
Poderíase dicir unha exaltación das feiras, dese espírito de feira, co pulpo, os postos, o mercado e por suposto a música.
Cantos/as artesáns haberá o sábado e de que oficios?
Haberá 17 artesáns e artesás todo un record e algúns quedaron fóra, non había mais espazo. Os oficios presentes serán do máis variado, dende artesáns da pedra, instrumentos musicais, artesáns da madeira, do coiro , da lá, etc un amplo abano de oficios que farán as delicias dos asistentes.
Obradoiros e moito lecer para os cativos tamén. Cóntanos.
Os nenos e nenas fomentarán a creatividade e o xogo libre a través dos obradoiros que traballan de maneira sinxela estes oficios, elaborarán xoguetes e complementos a través de materiais e procesos artesanais.
Os adultos, e porque non tamén os pequenos outra vez, farán unha bandexa de vimbio, a cestería é algo que gusta moito en Muras e que sempre atrae moito nas feiras.
Para rematar a xornada, festa rachada e concerto de SES. Que luxo, non?
Festa rachada coa Fanfarria Taquikardia e por suposto con Sés, concertos de luxo para un entorno incrible.
PROGRAMA DE ACTIVIDADES
Ás 12:00 h. está programada unha charla sobre desenvolvemento rural e entre as 11:30 e as 13:00 h. obradoiros para os máis pequenos con creación de broches e xoguetes. Para os máis pequenos tamén haberá outras actividades de lecer como malabares en horario de mañá e de tarde, xogos tradicionais con Xotramu de 16:00 a 19:00 h. e monicreques a cargo de ‘Títeres Alakrán’ entre ás 17:00 e as 18:00 h. Pola tarde haberá tamén un obradoiro de cestería para adultos ás 16:30 h.
No recinto festivo tamén haberá unha exposición dos traballos colaborativos das mulleres do grupo de manualidades de Muras e unha mostra de zocas e zapato artesanal do zapateiro Pedro Domínguez.
No apartado musical, pola mañá actuará na romaxe o grupo Pingarela e pola noite Fanfarria Taquikardia ás 19:30 h. e SÉS ás 20:45.
