A Deputación de Lugo destina 6,5 millóns de euros a diferentes iniciativas relacionadas co impulso do benestar social, servizos públicos municipais ou sector gandeiro da provincia.
Así o anunciou o portavoz do goberno provincial, Álvaro Santos, tras a xunta de goberno. Deste montante, 2,2 millóns de euros serán “para a construción do centro de maiores da Pontenova”, onde o goberno local “xa ten os terreos” tras adquirir un espazo de 2.200 metros cadrados preto do núcleo urbano. “Esta dotación social contará con 50 prazas, trinta de residencia (para maiores) e 20 de centro de día”, concretou.
Ademais, consíganse 1,2 millóns de euros para a construción dun centro de maiores en Ourol e ofrecer outro cincuenta prazas a maiores. “Neste caso rehabilitaremos o colexio de Vicente Casabella que a Xunta pechou en 2015”.
Doutra banda, dedícanse 1,4 millóns de euros para un convenio con ACRUGA (Asociación de Criadores de Raza Loura Galega) nas próximas anualidades para mellorar a cabana de loura galega na provincia que conta con 576 explotacións, o 72 por cento de granxas que hai na comunidade autónoma.
Contempla dúas liñas de actuación, por unha banda, a promoción e recría de tenreiros de loura galega na Granxa Gayoso Castro coa que se potencia esta tipoloxía de vaca a través de programas específicos de recría, mellora xenética e posterior venda de exemplares, na súa maioría en poxas en todo o territorio lucense.
A segunda liña a promoción de vacas reprodutoras inscritas no rexistro genealógico, liña pioneira de axudas directas aos gandeiros na que ACRUGA intervén como intermediario. “Con esta liña daranse axudas de 500 euros a vacas reprodutoras de loura galega, ata 500 vacas, polo primeiro parto”, pormenorizou. Ademais destínanse 140 mil euros para unha aplicación para móbiles sobre turismo, que “arrinca” na cidade de Lugo.
