Cafés Candelas Breogán gañou na súa visita a Divina Seguros Joventut (81-88) na vixésimo quinta xornada da Liga Endesa e sumou a súa oitava vitoria da tempada despois de catro derrotas consecutivas.
Os lucenses comezaron de xeito notable o partido cun 2-9 inicial despois dunha penetración de Aleksandar Cvetković, que comezou o encontro coma base para, a posteriori, ser escolta co debut de Ray McCallum mediado o primeiro cuarto. O Joventut reducía a desvantaxe con triplas. O Breogán sofría para defender o rebote defensivo, pese a encadear cinco ofensivos nos primeiros compases. A primeira vantaxe local foi 21-20 a falta de 8 minutos e 18 segundos para o descanso. Con tres tiros libres de Sergi Vidal volvían os lucenses a estar por diante (30-31). E cunha canastra de Ray McCallum, que sumou oito puntos na primeira metade, ampliaba o marcador favorable a 30-33. Respondía a Penya cun parcial de 6-0 (36-33). Os cataláns eran superiores na pintura e atopaban espazos coa dirección do base Nicolás Laprovittola, ex San Antonio Spurs. Con dous tiros libres do escolta Thad McFadden chegábase ao descanso coa máxima vantaxe do Joventut (40-35).
Na segunda metade, o Joventum ampliou a súa diferenza a favor até o 45-37. Lucio Redivo, con 6 puntos consecutivos, colocaba ao Breogán novamente en partido (49-47). E Alec Brown, con dous tiros libres, puxo aos lucenses en igualdade (55-55). Sergi Vidal, con dúas triplas, foi decisivo para o 57-59 e, posteriormente, 61-65. Entre medias, Volodymyr Gerun anotaba un dous máis un. O Breogán aumentaba o nivel en defensa e, cunha transición finalizada por Salva Arco, os lucenses estaban por diante con 5 puntos de marxe (68-73). E Alec Brown ampliaba a distancia (68-75) cunha canastra de clase contra taboleiro despois dunha asistencia de Ray McCallum. Posteriormente, máxima vantaxe lucense (69-77) cunha canastra de Volodymyr Gerun. Así a todo, a Penya seguía competindo con Nicolás Laprovittola na dirección e anotación e con Marko Todorovic na pintura. Así, situáronse a un só punto (80-81). Pero aí apareceu Lucio Redivo cunha tripla no derradeiro segundo de posesión a 17.8 segundos do final do cuarto cuarto despois dunha asistencia de McCallum e tras un rebote ofensivo de Volodymyr Gerun (80-84). Posteriormente, Marko Todorović anotaba un só tiro libre. Ray McCallum acertaba dous para o Breogán. A Penya erraba unha tripla de Nicolás Laprovittola e Johan Löfberg asinaba o 81-88 final cunha canastra no derradeiro segundo.
O máximo anotador breoganista foi Alec Brown, con 20 puntos, seguido por Volodymyr Gerun e Ray McCallum, ámbolos dous con 14.
