A nova tempada de pesca en augas fluviais da comunidade comezou hoxe oficialmente para os máis de 41.000 afeccionados galegos que contan este ano con licenza en vigor.

Con motivo da primeira xornada hábil para a pesca da troita, a directora xeral de Patrimonio Natural, Belén do Campo, acompañada polo delegado territorial da Xunta en Lugo, Javier Arias, o alcalde de Outeiro de Rei, José Pardo, o tenente de alcalde de Begonte, Luis Luaña, a entidade colaboradora de pesca Asociación Deportiva Río Ladra e os axentes e vixiantes medioambientais da zona, visitou esta mañá un tramo do río Ladra ao seu paso por ambos municipios lucenses, desde onde se referiu aos aspectos máis destacados da campaña 2022.

Así, explicou que, no caso da troita e tamén con carácter xeral, a tempada de pesca en Galicia estenderase ata o 31 de xullo, tal e como figura na orde publicada o pasado mes de febreiro e na que se recollen as normas que rexerán este ano para as distintas especies ictícolas das augas continentais galegas.

A directora xeral subliñou que ao igual que a tempada pasada, os luns serán inhábiles para pescar, agás festivos nacionais ou autonómicos. Os xoves serán hábiles unicamente para a modalidade de pesca sen morte en todas as masas de auga, excepto o 14 de abril (Xoves Santo), durante o que se poderá exercer a actividade segundo a modalidade de pesca autorizada en cada couto.

Tras dous anos marcados pola pandemia, a ‘volta á normalidade’ trae un incremento de máis de 4.000 licenzas respecto ao ano anterior. En total son 41.225 as licenzas de pesca tramitadas nas catro provincias, un dato superior ao de 2021 —cando a cifra foi de ao redor de 37.000 en toda Galicia—.

A directora xeral aproveitou a súa presenza no río Ladra para salientar a gran riqueza natural desta zona, incluída dentro da Rede Natura 2000 e tamén na Reserva de Biosfera Terras do Miño.

Para coñecer máis detalles dos períodos e tamaños permitidos por especie pódese acceder á páxina web de actualidade da Xunta de Galicia.