O Presidente da Deputación de Lugo, José Tomé Roca, participou este martes no Pavillón
Municipal de Deportes de Lugo na presentación da 47 edición da Copa da Raíña de Voleibol, que terá lugar do 11 ao 13 de febreiro na capital lucense.
O mandatario provincial destacou a importancia desta cita, que demostra que “a provincia de Lugo é unha potencia no deporte, en particular no deporte feminino, conta con equipos en practicamente todas as disciplinas deportivas, temos unha afección de primeiro nivel e temos unha sólida e longa tradición de traballo”.
“Un traballo”, subliñou, “que exemplifica o club Emevé, todo un referente, non xa no voleibol, senón para o deporte galego e nacional”. O Club Arenal Emevé será o anfitrión desta competición que congregará por primeira vez na cidade de Lugo aos seis mellores equipos ao final da primeira volta da Liga Iberdrola.
No acto tamén participaron a Alcaldesa de Lugo, Lara Méndez; a Subdelegada do Goberno, Isabel Rodríguez; a presidenta do Arenal Emevé, Bibi Bouza, o Secretario Xeral para o Deporte en Lugo, José Ramón Lete; o Vicepresidente da Federación Española de Vóleibol, José Ángel Luna; e o Deputado de Promoción Económica e Social, Pablo Rivera Capón.
“Acoller a Copa da Raíña de Voleibol poñerá á nosa provincia no foco de moita xente, das propias deportistas, dos equipos técnicos, dos familiares, dos afeccionados a este deporte e do público en xeral”, sinalou o mandatario provincial.
Polo tanto, engadiu, “esta competición é tamén unha boa maneira de dar a coñecer e de promocionar a provincia de Lugo, unha proxección que terá un impacto sobre o turismo e sobre a economía a curto prazo, pero, con toda probabilidade, tamén a medio prazo”, afirmou Tomé Roca.
“A provincia de Lugo ten unha gran canteira de deporte feminino, no voleibol, no fútbol sala, no atletismo ou no baloncesto, e dende a Deputación imos seguir respaldando o traballo de todos os clubes que, como o Arenal Emevé, loitan por manter os seus equipos femininos no máis alto do deporte galego e nacional”, afirmou o mandatario provincial durante a presentación da 47ª edición da Copa da Raíña de Voleibol.
