Dous traballadores do Club Baloncesto Breogán atópanse confinados por precaución despois do positivo por Covid-19 dun xogador do Granada, ao que se enfrontaron a semana pasada, e dun asistente do club andaluz.
Así o confirmaron fontes do club lucense, que explicaron que o conxunto se enfrontou a pasada semana ao Granada polo ascenso á liga ACB, que levou o Breogán, e que conduciu a distintas celebracións desde o balcón do Concello de Lugo e no Pazo Universitario.
Tras coñecerse o positivo en Granada, realizóuselle probas PCR a todo o persoal, con resultado negativo, do mesmo xeito que ao corpo técnico e directivo do equipo lucense.
Agora queda por coñecerse os resultados a eses dous traballadores, que se atopan en corentena ou illados nas súas casas “por precaución”, aínda que fontes do club aseguran que “non senten nada” con respecto á Covid.
Os xogadores, de distintos países, que conforman o persoal xa están de “vacacións” e moitos deles trasladáronse aos seus respectivos países, segundo sinalaron estas mesmas fontes do club baloncesto Breogán.
