Ao abeiro da última convocatoria da Consellería de Educación, a Xunta de Galicia dota ao sistema universitario da capacidade de liderado, estabilidade e dimensión necesarios en eidos de investigación considerados prioritarios. Con tal fin, creáronse catro novas agrupacións estratéxicas de I+D+i: unha delas é Biorrecursos, no Campus Terra de Lugo, que recibiu o bautismo institucional.
Dezaséis equipos compoñen a agrupación de Xestión e Produción Sostible de Biorrecursos (BioReDes), que percibirá 405.000 euros para abordar os retos vencellados á produción e xestión dos biorrecursos na particular contorna de Galicia. O investimento permitirá a coordinación e crecimento de grupos de referencia do Campus Terra relacionados coa produción animal, vexetal e de seguridade alimentaria.
Trátase dun proxecto a longo prazo, que pasa pola integración e as sinerxias dos proxectos científicos da Escola Politécnica Superior de Enxeñaría (EPSE) e á Facultade de Veterinaria. Canda o Instituto de Acuicultura, son en total máis dun cento de investigadores estables, corenta e dous en etapa de formación, e outras corenta e tres persoas de apoio técnico.
Paulino Martínez, catedrático en Xenética entrevistado no LugoXornal, liderará unha agrupación estratéxica responsable de máis de medio milleiro de artigos en revistas do primeiro cuartil entre 2010 e 2015, e que captou 12,5 millóns de euros nos últimos anos en financiamento para I+D+i. Un terzo destos recursos proceden da empresa galega, o que evidencia, en palabras de Martínez, a condición de BioReDes como “imprescindible para Galicia”.
