Unha votación popular dos veciños de Lugo elixiu Fuxan os Ventos como nome do novo auditorio. O grupo musical lucense, fundado en 1972, levou o 65% dos votos nunha enquisa con catro candidatos
A través dunha enquisa popular na web municipal, na que participaron máis de 3.000 persoas, escolleuse o nome do novo auditorio de Lugo. O gañador foi Fuxan os Ventos, que foi escollido entre catro posibilidades, a proposta de diferentes colectivos.
As opcións, ademais da gañadora, eran Darío Xohan Cabana, Maruja Mallo e Maruja Villanueva; con todo, a gañadora arrasou na votación. De feito, dos 3.007 votos rexistrados, 1.966 foron para esta proposta, o 65%. A seguinte máis votada foi a do poeta lucense, con 542 apoios. Fóra de prazo, un colectivo veciñal presentou tamén a proposta de Negra Sombra, pero ao final non se incluíu na consulta popular.
Con este nome recoñécese así a traxectoria dun dos grupos máis emblemáticos da música galega, fundado na cidade de Lugo en 1972.
O novo auditorio de Lugo abrirá as súas portas o 20 de decembro e contará con tres días de actividade cultural de alto nivel, comezando por un concerto de Ainhoa Arteta o primeiro día, que se repetirá o domingo. O sábado actuará a orquestra Terra Nova, composta por 150 músicos e coristas.
