Coque Malla, Milladoiro e Paula Matheus sumáronse á programación do San Froilán 2024 que o Concello de Lugo presentou este martes e que contará con máis de 200 actividades entre o 4 e o 12 de outubro. En concreto, o exlíder de Los Ronaldos estará na Horta do Seminario o 11 de outubro ás 22.00 horas, mentres que o día 12 será a quenda de Paula Matheus (21.00 horas, Praza de Santa María) e de Milladoiro (22.00 horas, Horta do Seminario), que celebra o seu 45 aniversario en Lugo.
Así, tal e como destacaron o tenente de alcaldesa, Rubén Arroxo, e a edil de Cultura, Maite Ferreiro, complétase unha programación “con diversos xéneros musicais e artistas emerxentes e consolidados”, cun cartel do que tamén forman parte Pedro Pastor, Mondra, Zetak ou Fillas de Cassandra, entre outros. Ademais, o San Froilán regresa con actividades tradicionais como o desfile do traxe tradicional, que este ano celebra a súa 52 edición, ou o desfile do gando, que terá lugar o 4 de outubro a partir das 18.00 horas.
Tamén se inclúen actividades como o XXII Festival de Música Tradicional de Cántigas e Frores; a Verbena Galega D’antes; ou a XXVI Mostra de Música Tradicional Galega do Domingo das Mozas, organizada pola Asociación de Gaiteiros Galegos. Así mesmo, as familias contarán con 15 actividades, que se celebrarán tanto na carpa do aparcadoiro do Seminario como nas rúas de Lugo dentro do San Froilán Miúdo. En total, o programa conta con 50 concertos en escenario e preto de 90 actividades de rúa, con pasarúas, espectáculos itinerantes, maxia, humor e animación nos barrios, ademais de 20 actividades deportivas ao longo de todo o mes de outubro.
