As obras de peonalización na rúa Ramón e Cajal na cidade de Lugo destaparon varios tramos de muro de mampostería de laxa, restos arqueolóxicos de orixe romana, este venres no transcurso dos traballos. Esta situación levou que os labores se continúen por outra zona “baixo un control estrito”, segundo informa o Concello de Lugo, mentres que o servizo de arqueoloxía procede a limpar, estudar e ditaminar a relevancia arqueolóxica dos restos atopados.

Segundo o consistorio, o proxecto de humanización e peonalización ‘Corazón Verde’ non se viu afectado “en absoluto”, dado que os traballadores e o Concello prevían esta situación tras as aparicións de hipocaustos romanos (habitacións que se quentaban cun sistema no chan) en escavacións anteriores da mesma rúa.

“A aparición de restos arqueolóxicos deste tipo supón unha excelente noticia para Lugo. A vontade do noso executivo é traballar para documentar o noso patrimonio, xa que supón unha oportunidade para todas e todos os lucenses polas posibles repercusións culturais e dinamizadores que a súa conservación implica para Lugo”, sinalou a alcaldesa de Lugo, Paula Alvarellos, nun comunicado.