A alcaldesa de Lugo, Lara Méndez, anunciou esta tarde que o Arde Lucus vén de obter a declaración de Festa de Interese Turístico Internacional, logo de que a finais do ano pasado o Concello iniciara a tramitación para acadar este distintivo tras o “labor e implicación do tecido asociativo que converteu esta celebración local nunha cita única en España”.
“É aos e ás lucenses que cada edición e durante todo o ano traballan de forma infatigable para recrear con fidelidade as nosas orixes, aos que compre atribuír a obtención desta distinción”, dixo Méndez en rolda de prensa.
A mandataria lucense fixo extensiva a súa gratitude non só ás 19 asociacións de recreación histórica que forman parte da organización dos festexos e que aglutinan a preto dun millar de socios e socias, senón tamén a moitas outras persoas que mobilizan a amigos e familiares e que cooperan na preparación de actividades programadas. Como decisivo é tamén o traballo que levan a cabo os distintos sectores da cidade, os patrocinadores e tamén os centros educativos, así como o equipo técnico municipal”.
O Arde Lucus foi foi declarada festa de Interese Turístico de Galicia en 2012 e no 2017 conseguiu o recoñecemento de festa de Interese Turístico Nacional.
