O actor Rafael Álvarez (El Brujo) volve a Lugo, seis anos despois da súa anterior actuación na cidade, para presentar a súa obra El alma de Valle Inclán. Este espectáculo, que creou durante o confinamento pola pandemia de Covid, representarao o día 30 deste mes, domingo, ás 20:00 horas no auditorio municipal Gustavo Freire. As entradas xa están á venda na web ataquilla.com.
“Durante o confinamento inspiroume este home singula e de vida vibrante”, apunta o actor Rafael Álvarez sobre un papel que di que “aliviou a súa melancolía” e curouno das “drásticas circunstancias” que estaba a vivir.
Rafael Álvarez naceu en Lucena (Córdoba) e pasou gran parte da súa infancia en Torredonjimeno (Jaén). Despois trasladouse a Madrid para estudar Dereito e foi nos colexios maiores onde tomou contacto por primeira vez co mundo del teatro. En 1995 crea, xunto a María José Norte, a súa propia produtora: Producciones El Brujo S.L., dedicada á distribución e a produción de teatro e audiovisuais.
Desde a súa primeira colaboración en 1969 na montaxe La escuela de los bufones, de Michel de Ghelderode, participou en numerosas obras de autores e directores da talla de Pío Baroja, José Luis Alonso de Santos, Gerardo Malla, Fernando Fernán Gómez, José Carlos Plaza, José Pascual e Alfonso Martínez de Toledo, entre outros.
A partir do ano 1986 Rafael Álvarez compaxina a súa actividade teatral co cine e a televisión, participando en películas como El Crack, de José Luis Garci; La taberna fantástica e Don Juan, mi querido fantasma, de Antonio Mercero; La leyenda de la doncella, de Juan Pinzas; Alma gitana, de Chus Gutiérrez; Amores que matan, de Juan Manuel Chumilla; La duquesa roja, de Paco Betriu; Niño nadie, de José Luis Borau; Pajarico, de Carlos Saura; e na adaptación de Fernando Fernán Gómez para o cine Lázaro de Tormes, película galardoada con dous Goyas da Academia de Cine español.
