O Encontro Universitario de Danza da USC celebrarase o 21 e 22 de abril no Vello Cárcere de Lugo, que acollerá intervencións artísticas de catro compañías.

En concreto, participan as compañías Danza USC-Compostela e Danza USC-Lugo, ligadas ao Espazo de Danza da USC, que coordina Juan Carlos Zahera, e das formacións SanTango e D-ou-tras, do Campus de Ourense da Universidade de Vigo.

Esta nova edición recupera a súa presenza no calendario de programación artística no marco do convenio Lugo Cultural, que recibe financiamento da USC, Concello de Lugo e Deputación de Logo.

Así, a representación inaugural será o 21 de abril, xoves, ás 21,00 horas, coa escenografía de ‘Espertares’, con coreografía de Xiana Vilas, a cargo da compañía Danza USC-Compostela, que estará acompañada nesta actuación da agrupación Pandereteiras USC.