Seguindo a tradición que se remonta ata o século XVIII, as autoridades de Lugo tomaron parte este xoves da conmemoración da festividade de San Roque. Como cada 16 de agosto, a comitiva reuniu aos membros da corporación local baixo a presidencia da alcaldesa, Lara Méndez.

Este grupo foi acompañado pola Garda de Gala, que partiu en formación dende o consistorio ata a capela de San Roque, onde se celebrou a misa en honra do santo. Cumpriuse deste xeito co voto que a cidade fixo en 1768, cando invocou a súa protección para facer fronte á epidemia da peste.

A homenaxe a 250 anos de amparo de San Roque tivo na véspera o seu equivalente coa Virxe dos Ollos Grandes, patroa de Lugo. Este costume ten precedentes dende a Alta Idade Media.