A comisión de artesáns da Asociación de Gaiteiras Galegas (AGG) estará un ano máis no Festival de Pardiñas de Guitiriz. Será a XXV Mostra de Instrumentos de Música Tradicional, ocasión especial logo dun cuarto de século da máis antiga e importante representación da Península Ibérica. Máis de trinta artesáns exporán o seu traballo estes días 4 e 5 de agosto no concello chairego.
Será un lugar de encontro para a música tradicional galega, representada por a máis ampla variedade de gaitas, requintas, zanfonas, tambores, bombos, pandeiretas, trompas ou violíns. A precisión dos profesionais deste gremio renovará o recoñecemento dos instrumentos tradicionais galegos, valorados no mundo enteiro. Todo, nun marco como é o Festival de Pardiñas de Guitiriz, escenario para unha fin de semana de música e baile folclórico, con actuacións en directo e obradoiros.
A XXV Mostra de Instrumentos de Música Tradicional abrirá co pregón a cargo do biólogo, profesor e gaiteiro ferrolán Xan Silvar, o sábado 4 ás 17.00 horas, en compañía do grupo Raparigos. Silvar é cofundador xunto a Carlos Cabrera desta formación, que grabou coa Polifónica de Bazán, o Orfeón Terra a Nosa e con Emilio Cao. O laureado Raparigos xurdiu cando eran alumnos do Constantino Bellón, en 1968. Asiduos de concursos e romarías, xiraron polas nacións atlánticas e representaron a Galicia na Expo de Sevilla.
Rematado o pregón, a festa continuará co concerto das Maraghotas ás 18.00 horas. Este cuarteto é resultado de diferentes experiencias musicais, un enerxético combo de timbres e texturas mesturado con melodías da tradición oral. Son mulleres sen fronteiras que fan uso de canto instrumento teñen dispoñible.
Cara ás 19.30 horas darase a coñecer a gañadora ou gañador do tambor, un sorteo posible grazas á doación do artesán Manels Percusión.
O domingo abre ás 11.30 horas coa apertura da mostra, seguida unha hora despois polo Obradoiro de Treboada da man do gaiteiro Oli Xiráldez. Este artesán explicará a formación instrumental típica da comarca do Baixo Miño, formada orixinariamente por unha gaita de barquín, un tambor e un ou dous bombos de grandes dimensións, e que se foi modificando, aumentando o número de bombos, e substituíndo a gaita de barquín pola de sopro directo.
Xa pola tarde será a vez do Obradoiro de Baile tradicional, ás 18.00 horas. Guiará a función o compostelán Gustavo Couto, mestre dende 2003 en distintos grupos e escolas, e director do OCT Ultreia dende 2009 ata 2017. É asemade coautor do Bailabén, editado por Edicións do Cumio.
Para rematar a xornada, o sorteo da gaita de buxo das 19.30 horas. Feita e doada pol’Os Canallas, é un traballo colaborativo de Alberto Pires, Oli Xiráldez, Queima, Alfonso Castro e Patricia González.
Amais das actividades previstas, o Festival de Pardiñas de Guitiriz conta cun escenario libre durante os dous días, para aqueles músicos que desexen tocar, ou artesáns que queiran facer algunha demostración.
A mostra permanecerá aberta ao público durante toda a fin de semana, cun horario de 17.00 a 21.30 o sábado, mentras que o domingo será de 11.30 a 14.00 e de 17.00 a 21.30 horas. Todas as actividades terán lugar no recinto preparado pola A.C. Xermolos de Guitiriz.
